الاهداء

اهداء الى امي اللي عرفتني عالكتب وبعدين معرفتنيش
اهداء الى بحر اسكندرية اللي نفذ الجريمة الكاملة
اهداء الى اختي مها بالدم ... وبقيت اخوتي فالهم
اهداء الى ابويا اللي بالصدفة البحتة يبقى اخو امي... واول من امن بي من الرجال
اهداء الى مصر قبل الفجر بس
اهداء لكل الولاد اللي جابتهم مصر قبل متمشي فالبطال
اهداء لاحمد العيدي اللي بيخليني اكسف من نفسي
واهداء لهشام اللي بيخليني اشك فنفسي
واهداء الى نجلاء اللي بخليها تشك فنفسها وفكل حاجة
اهداء لمعتز رفيق الدوامة.. اللي معاه ورق يوديني فستين داهية
واهداء لمحسن صديق الطفولة اللي اعرفه من تلت سنين
اهداء لعيش وحلاوة وكل الاحلام التي لم تكتمل
اهداء لسارة خان البنت اللي عمري مهنساها
واهداء الى مهران جافيدان امي في شيراز
واهداء لفيلم الكيت كات
واهداء لموسيقى فيلم الكيت كات
اهداء للمزيكا اللي بحبها وعمري معرفت اكتب وانا بسمعها
واهداء لمصطفى محمود اللي لحم دماغي من خيره
واهداء لعم نجم الوحيد اللي مبعش
واهداء لكل اللي خرجو منها زي مدخلو
واهداء للي خرجو من غير ميدخلو
اهداء للطيران اللي بحبه ومبيحبنيش
واهداء لمصطفى ماضي استاذي
اهداء لمصطفى ابو بكر صاحبي الانتيم اللي ميعرفش اني بكتب شعر
واهداء للبنت اللي مسحت كل اللي قبلها باستيكة
وبعدين مسحت نفسها
اهداء لنسيم الريح اللي بسمعها لاول مرة يوميا
واهداء لسيدنا الحسين اللي مات لوحده ... وعاش
واهداء لجارنا العجوز اللي عاش لوحده ومات
واهداء لبيتنا وحوش مدرستنا
ولنينجا تيرتيل وغزل البنات

قالولي زمان


قالولي زمان وانا صغير مفيش انسان بيتغير
وقالوالوش والمسكات تملي عمرها قصير
مدام الطبع كالعادة تملي بيغلب التطبيع
هتفرق تربية زيادة واحد بالجينات هيصيع !
انا صايع على الفطرة ولا بكيفي ولا بيدي
وكل مقول اكيدفترة الاقي العمر بيعدي
ولسة السنكحة كيفي
ولسة الصرمحة فدمي
ولسة ببوسها فالسيما... وتضحك اقولها اتلمي
ولسة بلف فالشارع وانا معرفش رايح فين
وفالفجرية عالكوبري مفيش غيري مع الاسدين
بدندن لحن اغنية وتيجي انتي على بالي
فصوتي يبتدي يقطع... ودمعة فعيني تتلالي
فاطلع نوتة الاشعار واقطع كل اورقها وافرقها
وتيجي الريح تبعزقها على الاسفلت فالشارع
ياست الكل انا واقع فعرضكلاجل تقريهم
وبعد متقري ... ارميهم او انسيهم
بحكم الطبع والعادة هتيجي قصيدي متعادة
مدام كار الكلام كاري ومفيش غير فافكاري
هتفضل كل اشعاري مفيش غيرك بنات فيهم

كانت هتفرق فالوداع

لو بس كنت ساعتها عارف ان دي المرة الاخيرة.... مية مية كانت هتفرق فالوداع
كنت هحضن سندس اللي فتانية تالت عالمشاع... واحنا طالعين ماللجان بعد اخر امتحان
واسالها لو بتشوف فلان ... طب فاهمة مادة ميس ايمان؟
طب ينفع ابقى اجيلكو عادي ؟... قصدي يعني البيت يساع ؟
لو بس كنت ساعتها عارف ان دي المرة الاخيرة.... مية مية كانت هتفرق فالوداع
كنت يومها اكيد هبيت عند جدي فشقته ... نلعب ورق ...نسهر سوا
ومش هاسيبه عشان ينام ليلتها من بعد الدوا
او يرد الشيش عشان ضهره بيتعب مالهوا
وقوله يعني بزمتك اخر نفس ساقع اخدته فصحتك
بقى ميسويش حبة وجع ؟ ... بطل دلع
جدي اللي مات دفيان ليلتها باللحاف
لو كان عرف ان الليلة دي وداع انفاس الهوا
مكنش رد الشيش فاخر ليله له
ومكنش خاف
كل الشوارع والمباني اللي مش هدخلها تاني
والاغاني اللي لما سمعتها ودندنتها من مرة واحدة مالسماع
مية مية كانت هتفرق فالوداع
يا كل حاجة كسبتها او سيبتها
ملحقتش اشبع منها اكمنها
قالت هنروح من بعض فين
يا ناس يا عبط يا عشمانين
فيه فرصة تانية للقى؟... بطلو اوهام بقى
وكفاية احلام واسمعو
عيشو بزمة وودعو كل حاجة بتعملوها وكل حد بتشفوه
وكل كلمة بتقلوها وكل لحن بتسمعوه
عيشو مشاهد كل مشهد زي ميكون الاخير
اشبعو ساعة الوداع واحضنو الحاجة بضمير
داللي فاضل مش كتير ...اللي فاضل مش كتير

سلك السماعة

تعرف اننا بالصلاة عازين ...كلنا عايشين عالارض مش فوق فالجنة
بنسدد قطم التفاحة
لو آدم كان بس استنى ... مشكان هيجيب ناس مرتاحة
ومكنش بقى اقصى املنا نوصل لمكان اصله مكانا ...ومخلوق مالاول علشنا
لكن احيانا م التفكير
الحبكة وفشئون التدابير
يطلع تفسير معقول بيقول
احيانا احداث الدنيا عشان تحصل
وخيوط اللعبة عشان توصل
مبينقصهاش غير شماعة الدنيا اساسا مالاول شيء يشبه سلك السماعة
يتلعبك منك فثواني وعشان يرجع مفرود تاني لازم تتعزب وتعاني
وتفكه فاكتر من ساعة

من غير مناهدة

الجاي مش اد اللي راح
وللا اللي جاي اكتر
الشاش على اد الجراح
وللا الجراح اكبر
لسه معاك فالمحفظة اللي يقضي دور كمان؟
وافرض يا حلو خسرتهم
اخسر لكن مبقاش جبان
والعب باخر فيش معايا
والزهر مينصفنيش كفاية
واجي يادوب قبل النهايه حظي يمشي على هوايا
فارمي الجنيه يرجع كتير
وارمي الكتير ... يرجعلي اكتر
وفلعبة واحدة الفيش يطير وارجع فاخر الدور مأشفر
وافضل كده طالع ونازل على كل طاولة افوت شوية
ومرة واحدة الدنيا تسكت ... صاحب المكان ينده عليا
وقولي هاه ... نفسك فايه
اسكت واتهته... واقول رضاك
يقولي تعبت وللا ايه ققوله خليني افضل معاك
يحضني جامد مرة واحدة
واللي خسرته فالف دور
يدهوني فضمة واحدة
يرمي جوه قلبي نور
القى كل حاجة غير
القى نفسي زي طير
عاش ومات من غير مناهدة

ندرت الندر


ندرت الدر بالساهل وكفرني عشان اوفيه
لكان الندر يستاهل ولا كفري نفع بعديه
ندرت الندر يا طاهرة ماسيبك واقفة فمظاهرة وفالاضراب وفالعصيان
تلوش الشومة والعصيان وفالاقسام مع الاقلام تكمل السهرة
ندرت الندر يا طهرة
نرت الندر يا دسوقي
اصارحك لاجل متفوقي
بجرحك لاجل يتعافى
واسيسك لجل نتصافى
واصحك لاجل متروقي
ندرت الندر يا دسوقي
ندرت بندر ابو العباس
يدوق سجاني نفس الكاس
اسد فديني من ماله
واكتف ايده بحباله
وناره الايده تحمالو
وادوس فوق منه زي مداس
ندرت بندر ابو العباس
ندرت الندر يا رفاعي
عقدت العزم والنية
راح اخد حقي بدراعي مدام عسكرها حرمية
وطفت وزورت كل مقام
مليته دموع بكى وكلام
كنست السيدة ياامام
فتلت يا عدرا شمعك فيه
ندرت الندر بالساهل وحتى لو هموت واوفيه
اكيد الندر يستاهل
مدام هتعيشي من بعديه


وحشتني امي

وحشتني امي ودعوتها ليا فمكالمة دولي قبل متقولي سلام
وتقولي مالك؟....ارد مالي اخر تمام
تقولي صوتك مش عجبني.... وقللها دا دور زكام
وقبل مالدمعة تخني ... اقول الووه..الصوت بيبعدواقفل قوام
وحشني خالي وحضنه اللي ريحته ريحة سجاير تايها فعباير برفان رجالي
وخالي ملهوش اولاد ولاد غيري انا... وزيي تمام ملهوش ميعاد ويومه بسنه
ويشتم فمصر ويلعن خرسها وانا اشتم فحسني وجمال و فحرسها
ونضحك....واقوله طايرتي بكرة ... فيسكت
يطلع علبة سجاير وياخد سيجارة ويقطع نفاسها